عنوان : “محبت بھرا لمس”

از: راحمین ایاز
وہ بوسیدہ دیوار، جس کی اینٹیں وقت کے ساتھ اپنی مضبوطی کھو چکی ہیں، اور وہ پرانی کھڑکی جس کی بنیاد میں وقت کی گرد اور زندگی کی کہانیاں بسی ہیں، ایک قدیم طرزِ زندگی کی گواہی دے رہی ہے۔ اس کھڑکی کے اندر، نیم تاریکی میں چند ننھے بلی کے بچے ایک دوسرے کے قریب دبکے بیٹھے ہیں، جیسے کسی انجانے لمس کے منتظر ہوں۔
ایک ننھا سا معصوم بچہ اپنی انگلیوں کے پوروں سے ان بلی کے بچوں کو چھونے کی کوشش کر رہا ہے۔ اس کی آنکھوں میں حیرت اور خوشی کے رنگ جھلک رہے ہیں، جیسے اسے اس کھڑکی کے اندر کوئی نیا جہان مل گیا ہو۔ وہ اپنی پوری کوشش میں مگن ہے کہ کسی طرح ان نرم و نازک مخلوقات کو محسوس کر سکے۔
دوسری طرف بلی کے بچے بھی بڑے انہماک اور معصومیت سے اس ننھے مہمان کو دیکھ رہے ہیں، جیسے وہ بھی اس لمس کی تڑپ کو محسوس کر رہے ہوں۔ ان کی چھوٹی چھوٹی آنکھوں میں حیرت اور اپنائیت کا امتزاج ہے، جیسے وہ اس بچے کی محبت اور خلوص کو سمجھ رہے ہوں اور اس بات کا اعتراف کرنا چاہ رہے ہوں کہ اللہ تعالیٰ نے انسان اور حیوان دونوں کو محبت کے ایک ہی خمیر سے گوندھا ہے۔
یہ منظر محبت اور معصومیت کی ایک مکمل تصویر ہے، جہاں نہ کوئی خوف ہے، نہ کوئی فاصلہ، بلکہ صرف ایک معصوم سی چاہت ہے، جو دو مختلف مخلوقات کے درمیان ایک ان دیکھے رشتے کو جنم دے رہی ہے۔