چین اور پاکستان خطے میں امن و استحکام کے تحفظ کے لیے نئی کوششیں کریں گے، چینی وزارت خارجہ

بیجنگ (یو این پی ) چینی وزارت خارجہ کی ترجمان ماؤ نِنگ نے یومیہ پریس کانفرنس کی صدارت کرتے ہوئے پاکستان کے نائب وزیراعظم اور وزیر خارجہ اسحاق ڈار کی چین آمد کے حوالے سے کہا کہ چین اور پاکستان باہمی اعتماد اور باہمی حمایت پر مبنی ہمہ موسمی اسٹریٹجک شراکت دار ہیں۔منگل کے روز انہوں نے کہا کہ دونوں ممالک اہم بین الاقوامی و علاقائی امور پر ہم آہنگ مؤقف اور قریبی رابطے برقرار رکھتے ہیں۔ یقین ہے کہ دونوں ممالک کے وزرائے خارجہ ایران کی صورتحال سمیت باہمی دلچسپی کے بین الاقوامی اور علاقائی مسائل پر اسٹریٹجک رابطے اور ہم آہنگی کو مضبوط کریں گے، مل کر امن و انصاف کی آواز بلند کریں گے، اور جنگ بندی اور خطے میں امن و استحکام کے فروغ کے لیے نئی کاوشیں بروئے کار لائیں گے۔